गजल - "अब केही..."

अब केही नौलो काम गरुँ गरुँ जस्तो लाग्यो ।
राष्ट्र सिंच्न रक्त पोखी मरुँ मरुँ जस्तो लाग्यो ।

भनिदेउ जुन तारा सम्भव यो छ की छैन
मुलुकमा भाइचारा छरुँ छरुँ जस्तो लाग्यो ।

डाँडा पाखा सुख्खा भयो पालुवा क्यै देखिएन
प्रकृतिको बर्षा बनी परुँ परुँ जस्तो लाग्यो ।

रोकिएन आँशु कतै चोटै चोट जताततै
मलम् बनी फाट्या घाउ भरुँ भरुँ जस्तो लाग्यो ।

आमा दुखिन् मैत्री टुट्यो छोराहरू लड्या लड्यै
बेहाल यो रोक्न अघि सरुँ सरुँ जस्तो लाग्यो ।


आनन्द भट्टराई 'गाउँले'
खोटाङ