गजल - "तिमी बाहेक..."

तिमी बाहेक मनले अरु छान्दैछानेन ।
छोडी जान यो आँखाले मान्दैमानेन ।

जब तिमी मुस्कुरायौ मेरो सामुन्ने
ढुक्ढुकीले गति रोक्न जान्दैजानेन ।

नसा नसा सल्बलायो तिम्रो आकृति
त्यसैले त धैर्यलेनी धान्दैधानेन ।

तिमी भित्रै देखे पछि नील गगन
उडें कहाँ गुरुत्वले तान्दैतानेन ।

गोधुलिमा जब जुध्यो पैलो नजर
यो आत्माले बिरानो हौ ठान्दैठानेन ।



आनन्द भट्टराई 'गाउँले'
खोटाङ        

गजल - "छाती चर्कियो..."

छाती चर्कियो मध्य रातमा ।
पीडा बल्झियो मध्य रातमा ।

प्रेम नगरी छोडी गयौ की
मेघ गर्जियो मध्य रातमा ।

मन गएछ तिम्रो साथमा
तन याँ थियो मध्य रातमा ।

भइ छट्पटी निद छैन लौ
याद बर्सियो मध्य रातमा ।

कस्तो मोहनी लायौ निस्ठुरी
आँशु झर्दियो मध्य रातमा ।

नगरी = नगर, शहर

आनन्द भट्टराई "गाउँले"
खोटाङ    

गजल - "दु:खले आर्ज्यो..."

दु:खले आर्ज्यो केही जुटायो ।
दैवले फेरि गाँसै टुटायो ।

मान्छेको 'कु' त वास्ता गरेन
प्रकृतिलेनै सर्व लुटायो ।

नपाई चाल कस्ले हो कुन्नी
उस्को र उन्को साथ छुटायो ।

लौ भनिदेउ ए जून तारा
असिना झारी कस्ले कुटायो ।

डटेर लड्दा नसकेरनै
अर्धाङ्गिनीको चुरा फुटायो ।


आनन्द भट्टराई "गाउँले"
खोटाङ        

गजल - "सम्झेर ढुक्ढुकी..."

सम्झेर ढुक्ढुकी फर्केर आऊ ।
अमर प्रेमका क्यै गीत गाऊ ।

विवेकी बनेर खियाई जाँदा
अबश्य तर्दछ प्रेमको नाउ ।

वैरीको निशानी चुकाइ तिम्ले
कहिल्यै नचुक्ने लौ प्रीत लाऊ ।

यो जोवन् तिम्रै यो हाँसो तिम्रै
मायाको हुँदैन तोकेको भाउ ।

इच्छाए तिमिले दैवले दिन्छन्
सपना साँचेर मन्दिर धाऊ ।

तोडेर कसम नहिँड प्रिय
भरिन्न कहिल्यै मुटुको घाउ ।


आनन्द भट्टराई "गाउँले"
खोटाङ