गजल - 'पूर्ण समर्पण...'

पूर्ण समर्पण आज दर्शायो तिम्रो चिठ्ठीले ।

हर्षको प्याला साँच्चै बर्सायो तिम्रो चिठ्ठीले ।

 

विछोडिदाको वेदना खपी दुखेको मेरो

घाइते मुटु सद्दे बनायो तिम्रो चिठ्ठीले ।

 

कोपिला थियौ फुलेछौ ऐले बास्ना फैलाई

कता हो कता उमङ्ग छायो तिम्रो चिठ्ठीले ।

 

जवानी साँची मायाले डाक्दा यो र्हिदयमा

आशाको नयाँ दियो सल्कायो तिम्रो चिठ्ठीले ।

 

आउँछु फर्की सजाइ राख हाम्रो चौतारी

नौलो बिहानी बाटो खुलायो तिम्रो चिठ्ठीले ।

 

 

 

आनन्द भट्टराई 'गाउँले'

खोटाङ

गजल - 'प्रभातको आकाशझैँ...'

प्रभातको आकाशझैँ खुलेको छ मेरो जवानी ।

मार्सी धान झुले जस्तै झुलेको छ मेरो जवानी ।

 

धेरै भयो प्रवाशमा फर्की आउ मेरो पियारा

तिमी गा'को क्षितिजमै घुलेको छ मेरो जवानी ।

 

तिमी बिना अपुरो छ रागे ढुङ्गा हाम्रो चौतारी

विरहमै लेक बेंसी डुलेको छ मेरो जवानी ।

 

अध्यारो यो जिन्दगीमा रश्मी बनी आउ चुमेर

उजेलीको रहरमै भुलेको छ मेरो जवानी ।

 

कोपिलामै छाडी गयौ उपरान्त आइ समाल

सयपत्री फुले जस्तै फुलेको छ मेरो जवानी ।

 

 

आनन्द भट्टराई 'गाउँले'

खोटाङ

गजल - 'प्रयोग बिना...'

प्रगोग बिना सिद्दान्तको पढाई के हुन्छ र ।

कलमको युगमा खुकुरीको लडाइँ के हुन्छ र ।

 

प्रतिपादन गर्नेले नै गरे पछि उल्लङ्घन्

जनतामा प्रणालीको कडाइ के हुन्छ र ।

 

कर्म गरे सुख मिल्ने बिर्सिएर यथार्थ

जन्तु मारी रगत बली चढाइ के हुन्छ र ।

 

यात्रा गर्नु भन्दा पै'ले नतोकिनै गन्तव्य

बेसुरैमा यात्रा अघि बढाइ के हुन्छ र ।

 

अजम्बरी भैसकेको राष्ट्र पाले शहिदको

प्रतिमामा अगरबत्ती डढाइ के हुन्छ र ।

 

 

आनन्द भट्टराई 'गाउँले'

खोटाङ

 

नोट:-  घायलको तरही मुसायरा भाग २५ को आधारमा रचित गजल ।

गजल - "माया बुन्ने शिल्पी हात..."

माया बुन्ने शिल्पी हात माग्या थिएँ तिमीसँग ।

जवानीको थोरै मात माग्या थिएँ तिमीसँग ।

 

सामिप्यमा रहि अब बाँकी यात्रा गरौं भन्दा

"हुन्छ" भन्ने एकै बात माग्या थिएँ तिमीसँग ।

 

हिमालको सेरोफेरो दौँतरीको रस घोली

रमौं भनि तिम्रो साथ माग्या थिएँ तिमीसँग ।

 

बनावटी हाँसो हैन प्रकृतिले सिर्जिएको

चाँदनीको नौलो रात माग्या थिएँ तिमीसँग ।

 

आज एक्लै छोडी जाँदा भन्न बाध्य भएको छु

जिन्दगीमा घातै घात माग्या थिएँ तिमीसँग ।

 

 

आनन्द भट्टराई 'गाउँले'

खोटाङ 

 

नोट:- घायलको तरही मुसायरा भाग २४ को आधारमा रचित गजल । 

गजल - "दिन रात के कुरा..."

दिन रात के कुरा भो आखिर दुवै ढल्नु पर्छ ।
ढलेका ती दिन रात सँगै मान्छे चल्नु पर्छ ।

जिन्दगीको पखेरोमा ऐसेलुको बोट जस्तै
रमाएर रस हाली काँडा बीच फल्नु पर्छ ।

बाँचुन्जेल लुछा छाडी द्रव्य माथी सुते पनि
मरे पछि खाली हात चीता माथी जल्नु पर्छ ।

हात पर्ने फुत्की जाने दौलतको के भरोसा
सन्ततीले गरि खान्छन् बरु राष्ट्र मल्नु पर्छ ।

एक मरे हजारले देख्छन् भने सत्य मार्ग
ज्योति दिन आँफै जली दियो जस्तै बल्नु पर्छ ।

पसिनाको खेती गरे अजम्बरी बाली पाक्छ
साहशले संघर्षमा आँधी हुरी छल्नु पर्छ ।


आनन्द भट्टराई "गाउँले"

गजल - "बाचा गरी..."

बाचा गरी मेल भयो ।
फेरि आज झेल भयो ।

तिम्रो माया पिना यहाँ
अरु तिर तेल भयो ।

स्वतन्त्रता पुज्य प्रेम
यथार्थमा नेल भयो ।

त्यो बैंश त मेरो लागि
कागलाई बेल भयो ।

जुनी काट्न भनि ला'को
माया आज खेल भयो ।


आनन्द भट्टराई "गाउँले"

नोट:- घायलको तरही मुसायरा भाग २३ को आधारमा रचित गजल । 

गजल - "नशालु त्यो मधुरिमा..."

नशालु त्यो मधुरिमा तोडे हुन्छ अब ।
संजीवनी भेटे पनि छोडे हुन्छ अब ।

जवानीको पुष्पकुन्ज हराभरा देख्छु
विधिमान्य घुम्टो तिम्ले ओडे हुन्छ अब ।

सदिच्छाको भकारी छ आफन्तको मेरा
नगरिमा आइ नाता जोडे हुन्छ अब ।

कालगती रोकिंदैन बुझ्नु पर्छ संधै
र्हिदयका दुविधा ती गोडे हुन्छ अब ।

बिस्कुन सरी सुकेपछी बौरिंदैन बैंश
तिम्रो सोच विचार त्यो मोडे हुन्छ अब ।

 कालगती = समयको गती 

आनन्द भट्टराई "गाउँले"


नोट:- घायलको तरही मुसायरा भाग २२ को आधारमा रचित गजल ।